Wani abin alhini da ya girgiza ƙungiyoyin ƙwadago a Najeriya shine, an kama Kwamared Joe Ajaero, Shugaban Ƙungiyar Ƙwadago ta Najeriya (NLC) a yau.
Rahotanni sun tabbatar da cewa, jami’an Hukumar Tsaro ta Farin Kaya (DSS) sun kama Ajaero a Filin Jirgin Sama na Nnamdi Azikiwe da ke Abuja a safiyar yau. An yi zargin cewa yana kan hanyarsa ne zuwa wani taro na hukuma da Ƙungiyar Ƙwadago ta Ƙasar Ingila (TUC).
A halin yanzu, Ajaero yana tsare a ofishin Mai Ba da Shawara kan Harkokin Tsaro (NSA). Har yanzu dai ba a san dalilan da suka sa aka kama shi ba.
Wannan lamari ya haifar da bacin rai a tsakanin ƙungiyoyin ƙwadago da ƙungiyoyin farar hula, waɗanda suka ɗauke shi a matsayin wani hari ga haƙƙin ma’aikatan Najeriya. NLC ta yi Allah wadai da kamen tare da kira da a gaggauta sakin Ajaero.
Muna ci gaba da bibiyar lamarin, za mu ci gaba da kawo muku ƙarin bayani idan mun same su.
