PARIS, Aug 24 – Ƙasashen Yamma sun yi gargaɗin cewa Rasha na yi wa ƙungiyoyin EU da NATO kutsen intanet, a lokacin da ake ƙara samun fargabar leƙen asirin Rasha a Turai tun bayan fara yaƙin Ukraine shekara biyu da suka gabata.
Ƙasashen da suka fitar da gargaɗin sun haɗa da Birtaniya, Amurka, Jamus, Australia, Ukraine, Kanada, Jamhuriyar Czech, Latvia, Estonia, da Netherlands. Sun bayyana cewa tun daga shekarar 2020, hukumar leƙen asirin Rasha ta yi ƙoƙarin mayar da ayyukanta zuwa kutsen intanet, tare da zargin cewa tana da hannu a yunƙurin juyin mulki da maƙarƙashiya.
Kamfanonin da suka shafi fannonin kuɗi, zirga-zirga, makamashi, da lafiya sun bayar da rahoton kutse a ƙasashen mambobin NATO da Tarayyar Turai. Ƙasashen sun yi amanna cewa manufar hukumar leƙen asirin ita ce kawo cikas ga kai kayan agaji zuwa Ukraine.
Haka zalika, sun yi gargaɗin cewa hukumar leƙen asirin Rasha ce ta jagoranci jerin hare-hare intanet da aka kai wa Ukraine a shekarar 2022. A watan Mayun da ya gabata, Jamus ta zargi Rasha da ƙaddamar da hare-hare kan hukumar tsaro da kamfanonin jiragen sama da dimokraɗiyyarta.
Ƙasashen Yamma suna ci gaba da ƙarfafa matakan tsaro don kare kansu daga wannan barazanar kutsen intanet daga Rasha, wanda ke haifar da damuwa a fannin tsaro na kasa da kasa.
