Wata fashewar silinda mai iskar gas a wata tashar mai da ke karamar hukumar Jibia ta jihar Katsina ta yi sanadiyyar asarar motoci da dama, kamar yadda rundunar ‘yan sandan jihar ta bayyana.
Kakakin rundunar ‘yan sandan jihar, Abubakar Sadiq-Aliyu ne ya bayyana hakan a wata sanarwa da ya fitar a Katsina ranar Juma’a.
Ya bayyana cewa, a ranar Juma’ar da ta gabata ne jami’an ‘yan sandan da ke hedikwatar ‘yan sanda reshen Jibia suka ji karar fashewar wani abu mai karfi wanda hakan ya sa jami’in ‘yan sandan shiyya ya jagoranci tawagarsa zuwa wurin tare da hadin gwiwar jami’an soji.
“Da isowar jami’an ‘yan sandan sun gano wata babbar mota makare da injinan iskar gas ta kone kurmus a tashar Tamal da ke kan titin Kagadama-Magamar Jibia.
